ವಾಷಿಂಗ್ಟನ್: ರಷ್ಯಾದಿಂದ ಭಾರತ ಕಚ್ಚಾ ತೈಲ ಖರೀದಿಸುತ್ತಿರುವುದನ್ನು ಆಧರಿಸಿ, ಅಮೆರಿಕ ಮತ್ತು ಭಾರತದ ನಡುವಿನ ವ್ಯಾಪಾರ ಬಿಕ್ಕಟ್ಟು ಮತ್ತಷ್ಟು ಗಂಭೀರಗೊಂಡಿದ್ದು, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತೆ ಭಾರತಕ್ಕೆ ತೀವ್ರ ಎಚ್ಚರಿಕೆ ನೀಡಿದ್ದಾರೆ. ಮುಂದಿನ 24 ಗಂಟೆಗಳಲ್ಲಿ ಭಾರತದಿಂದ ಆಮದು ಮಾಡಿಕೊಳ್ಳುವ ಎಲ್ಲ ಸರಕುಗಳ ಮೇಲೂ ಗಣನೀಯ ಮಟ್ಟದ ಸುಂಕ (Tariff) ಹೆಚ್ಚಳ ಮಾಡುವುದಾಗಿ ಅವರು ತಿಳಿಸಿದ್ದಾರೆ.
ಭಾರತ ಉತ್ತಮ ಪಾಲುದಾರವಲ್ಲ: ಟ್ರಂಪ್ ಆರೋಪ
ಟ್ರಂಪ್ ಹೇಳುವಂತೆ, “ಭಾರತವು ಉತ್ತಮ ವ್ಯಾಪಾರ ಪಾಲುದಾರವಲ್ಲ. ಅವರು ನಮ್ಮಿಂದ ಹೆಚ್ಚು ಖರೀದಿಸದೇ ಇರುವ ನಡುವೆಯೂ, ನಾವು ಅವರಿಗೆ ಹೆಚ್ಚು ಮಾರುತ್ತೇವೆ. ಇದರಿಂದಾಗಿ ಈ ವ್ಯವಹಾರ ಅನ್ಯಾಯವಾಗಿದೆ. ಭಾರತ ನಮ್ಮ ಎಚ್ಚರಿಕೆಯನ್ನು ಲೆಕ್ಕಿಸದೆ ರಷ್ಯಾದಿಂದ ನಿರಂತರವಾಗಿ ತೈಲ ಖರೀದಿಸುತ್ತಿದ್ದು, ಈ ಮೂಲಕ ಯುದ್ಧ ಯಂತ್ರಕ್ಕೆ ಇಂಧನ ತುಂಬುತ್ತಿದ್ದಾರೆ.”
ಭಾರತ ಲಾಭದತ್ತ ಹರಿದಾಡುತ್ತಿದೆ
ಇದಕ್ಕೂ ಮುನ್ನದ ದಿನವೇ ಟ್ರಂಪ್ ಭಾರತ ರಷ್ಯಾದಿಂದ ತೈಲ ಖರೀದಿಸಿ ಅದನ್ನು ಮುಕ್ತ ಮಾರುಕಟ್ಟೆಯಲ್ಲಿ ಮಾರಿ ಲಾಭ ಗಳಿಸುತ್ತಿದೆ ಎಂದು ಆರೋಪಿಸಿದ್ದರು. “ಭಾರತ ಕೇವಲ ಖರೀದಿ ಮಾತ್ರ ಮಾಡುತ್ತಿಲ್ಲ, ಅದು ಮಾರಾಟದಿಂದ ದೊಡ್ಡ ಮಟ್ಟದಲ್ಲಿ ಲಾಭ ಕೂಡ ಪಡೆಯುತ್ತಿದೆ. ಉಕ್ರೇನ್ನಲ್ಲಿ ರಷ್ಯಾ ನಡೆಸುತ್ತಿರುವ ಯುದ್ಧದಿಂದ ಅಸಂಖ್ಯಾತ ಮಂದಿ ಸಾವಿಗೀಡಾಗುತ್ತಿರುವಾಗಲೂ ಭಾರತ ಬೆದರಿಕೆಗೂ ಒಳಗಾಗಿಲ್ಲ,” ಎಂದು ಅವರು ಟೀಕಿಸಿದರು.
ಭಾರತಕ್ಕಿಂತ ಪಾಕಿಸ್ತಾನಕ್ಕೆ ಕಡಿಮೆ ಸುಂಕ
ಆಗಸ್ಟ್ 7ರಿಂದ ಜಾರಿಗೆ ಬರುವಂತೆ ಟ್ರಂಪ್ ಭಾರತದಿಂದ ಆಮದು ಮಾಡುವ ಎಲ್ಲ ಉತ್ಪನ್ನಗಳ ಮೇಲೂ ಶೇ.25ರಷ್ಟು ಸುಂಕ ವಿಧಿಸಲು ಒಪ್ಪಿಗೆ ನೀಡಿದ್ದಾರೆ. ಆದರೆ ಪಾಕಿಸ್ತಾನಕ್ಕೆ ಮಾತ್ರ ಶೇ.19ರಷ್ಟು ಸುಂಕ ನಿಗದಿಪಡಿಸಲಾಗಿದೆ. ಭಾರತದಿಂದ ಬೃಹತ್ ಪ್ರಮಾಣದಲ್ಲಿ ಕಚ್ಚಾ ತೈಲ ಮತ್ತು ರಷ್ಯಾದ ಸೇನಾ ಉಪಕರಣಗಳ ಖರೀದಿ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಭಾರತ – ರಷ್ಯಾ ನಡುವೆ ಆಳವಾದ ತೈಲ ವ್ಯವಹಾರ
ರಷ್ಯಾದಿಂದ ಭಾರತ ಸುಮಾರು ಶೇ.35–40ರಷ್ಟು ತೈಲವನ್ನು ಆಮದು ಮಾಡಿಕೊಳ್ಳುತ್ತಿದೆ. ಉಕ್ರೇನ್ ಯುದ್ಧ ಆರಂಭಕ್ಕೂ ಮುನ್ನ ಭಾರತ ಕೇವಲ ಶೇ.0.2ರಷ್ಟು ತೈಲವನ್ನು ಮಾತ್ರ ರಷ್ಯಾದಿಂದ ಖರೀದಿಸುತ್ತಿತ್ತು. ತೈಲ ಖರೀದಿಯಲ್ಲಿ ಚೀನಾದ ನಂತರ ಭಾರತವೇ ಎರಡನೇ ಅತಿದೊಡ್ಡ ಗ್ರಾಹಕ ದೇಶವಾಗಿದೆ.ಇದನ್ನು ಓದಿ –ಉತ್ತರಕಾಶಿಯಲ್ಲಿ ಭೀಕರ ಮೇಘಸ್ಫೋಟ
ಟ್ರಂಪ್ ಈ ಟಿಪ್ಪಣಿಯಿಂದ ಭಾರತ – ಅಮೆರಿಕ ವ್ಯಾಪಾರ ಸಂಬಂಧ ಮತ್ತಷ್ಟು ಬಿಕ್ಕಟ್ಟಿನ ಹಾದಿ ಹಿಡಿಯುವ ಸಾಧ್ಯತೆ ಹೆಚ್ಚಾಗಿದೆ.
