- ದೇಶಾದ್ಯಂತ ಮಾದರಿ ಪರೀಕ್ಷೆಗೆ ಎಫ್ಎಸ್ಎಸ್ಎಐ ಆದೇಶ
ನವದೆಹಲಿ: ಮೊಟ್ಟೆಗಳ ಗುಣಮಟ್ಟ ಮತ್ತು ಆಹಾರ ಸುರಕ್ಷತೆ ಕುರಿತು ಆತಂಕಕಾರಿ ವರದಿಗಳು ಪ್ರಕಟವಾದ ಹಿನ್ನೆಲೆಯಲ್ಲಿ, ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (ಎಫ್ಎಸ್ಎಸ್ಎಐ) ದೇಶಾದ್ಯಂತ ಮೊಟ್ಟೆಗಳ ಮಾದರಿಗಳನ್ನು ಸಂಗ್ರಹಿಸಿ ಪರೀಕ್ಷೆ ನಡೆಸುವಂತೆ ತನ್ನ ಪ್ರಾದೇಶಿಕ ಕಚೇರಿಗಳಿಗೆ ನಿರ್ದೇಶನ ನೀಡಿದೆ.
ಮೊಟ್ಟೆಗಳಲ್ಲಿ ನಿಷೇಧಿತ ನೈಟ್ರೋಫ್ಯೂರಾನ್ ಪ್ರತಿಜೀವಕಗಳ ಅವಶೇಷಗಳಿರುವ ಸಾಧ್ಯತೆ ಬಗ್ಗೆ ಆರೋಪಗಳು ಕೇಳಿಬಂದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಇತ್ತೀಚೆಗೆ ಎಗ್ಗೋಜ್ ವಿತರಿಸಿದ ಕೆಲವು ಮೊಟ್ಟೆಗಳ ಗುಣಮಟ್ಟದ ಬಗ್ಗೆ ವಿವಾದ ಉಂಟಾದ ನಂತರ, ನೈಟ್ರೋಫ್ಯೂರಾನ್ ಗಳ ಅಕ್ರಮ ಬಳಕೆಯ ಶಂಕೆ ವ್ಯಕ್ತವಾಗಿತ್ತು. ನೈಟ್ರೋಫ್ಯೂರಾನ್ ಗಳು ಆಹಾರ ಉತ್ಪಾದಿಸುವ ಪ್ರಾಣಿಗಳಲ್ಲಿ ಬಳಸಲು ನಿಷೇಧಿತ ಪ್ರತಿಜೀವಕಗಳಾಗಿದ್ದು, ಯುರೋಪಿಯನ್ ಯೂನಿಯನ್ ಸೇರಿದಂತೆ ಹಲವು ದೇಶಗಳಲ್ಲಿ ಇವುಗಳ ಬಳಕೆಯನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಆದರೆ ಅಕ್ರಮ ಬಳಕೆಯಿಂದಾಗಿ ಕೆಲವೊಮ್ಮೆ ಮೊಟ್ಟೆಗಳಲ್ಲಿ ಅವಶೇಷಗಳು ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ ಎಂದು ತಜ್ಞರು ತಿಳಿಸಿದ್ದಾರೆ.
ಎಎನ್ಐ ಮೂಲಗಳ ಪ್ರಕಾರ, ಬ್ರಾಂಡೆಡ್ ಹಾಗೂ ಬ್ರಾಂಡೆಡ್ ಅಲ್ಲದ ಮೊಟ್ಟೆಗಳ ಮಾದರಿಗಳನ್ನು ದೇಶದ ಹತ್ತು ಪ್ರಯೋಗಾಲಯಗಳಿಗೆ ಕಳುಹಿಸಿ ಪರೀಕ್ಷೆ ನಡೆಸುವಂತೆ ಎಫ್ಎಸ್ಎಸ್ಎಐ ಸೂಚನೆ ನೀಡಿದೆ. ಈ ಪರೀಕ್ಷೆಗಳ ಮೂಲಕ ನೈಟ್ರೋಫ್ಯೂರಾನ್ ಗಳ ಉಪಸ್ಥಿತಿ ಇದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲಾಗುತ್ತದೆ.
ಆರೋಗ್ಯ ತಜ್ಞರು ಈ ವಿಚಾರದ ಗಂಭೀರತೆಯನ್ನು ಎತ್ತಿ ತೋರಿಸಿದ್ದು, ಮಕ್ಕಳ ಆರೋಗ್ಯದ ಮೇಲೆ ಇದರ ಪರಿಣಾಮ ಹೆಚ್ಚು ಅಪಾಯಕಾರಿಯಾಗಿದೆ ಎಂದು ಎಚ್ಚರಿಸಿದ್ದಾರೆ. ಶಾಲಿಮಾರ್ ಬಾಗ್ ಫೋರ್ಟಿಸ್ ಆಸ್ಪತ್ರೆಯ ಹಿರಿಯ ಮಕ್ಕಳ ವೈದ್ಯ ಡಾ. ವಿವೇಕ್ ಜೈನ್ ಮಾತನಾಡಿ, “ನೈಟ್ರೋಫ್ಯೂರಾನ್ ಕಲುಷಿತ ಮೊಟ್ಟೆಗಳ ಸೇವನೆಯು ವಿಷಕಾರಿ, ಕ್ಯಾನ್ಸರ್ ಕಾರಕ ಮತ್ತು ಜೀನೋಟಾಕ್ಸಿಕ್ ಪರಿಣಾಮಗಳಿಗೆ ಕಾರಣವಾಗಬಹುದು. ಮಕ್ಕಳ ಅಂಗಾಂಗಗಳು ಮತ್ತು ರೋಗನಿರೋಧಕ ವ್ಯವಸ್ಥೆ ಇನ್ನೂ ಅಭಿವೃದ್ಧಿ ಹಂತದಲ್ಲಿರುವುದರಿಂದ ಅವರು ಹೆಚ್ಚು ಅಪಾಯಕ್ಕೆ ಒಳಗಾಗುತ್ತಾರೆ. ದೀರ್ಘಕಾಲ ಸೇವನೆಯಿಂದ ಯಕೃತ್ತಿನ ಹಾನಿ, ರೋಗನಿರೋಧಕ ಶಕ್ತಿಯ ಕುಸಿತ ಮತ್ತು ಬೆಳವಣಿಗೆ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಇದೆ” ಎಂದು ತಿಳಿಸಿದರು.
ಈ ಹಿನ್ನೆಲೆಯಲ್ಲಿ ಆಹಾರ ಸುರಕ್ಷತಾ ತಪಾಸಣೆಗಳನ್ನು ಕಟ್ಟುನಿಟ್ಟಾಗಿ ಜಾರಿಗೆ ತರಬೇಕು ಮತ್ತು ನಿಯಂತ್ರಿತ, ವಿಶ್ವಾಸಾರ್ಹ ಮೂಲಗಳಿಂದಲೇ ಮೊಟ್ಟೆಗಳನ್ನು ಖರೀದಿಸುವಂತೆ ಅವರು ಸಲಹೆ ನೀಡಿದರು.ಇದನ್ನು ಓದಿ –ಸುಳ್ಳು ಪ್ರಕರಣದ ನೆಪದಲ್ಲಿ ವಸೂಲಿ: ಪಿಎಸ್ಐ ಅಮಾನತು
ವಿವಾದಕ್ಕೆ ಪ್ರತಿಕ್ರಿಯಿಸಿದ ಎಗ್ಗೋಜ್ ಸಂಸ್ಥೆ, ತನ್ನ ಉತ್ಪನ್ನಗಳ ಸುರಕ್ಷತೆ ಬಗ್ಗೆ ಗ್ರಾಹಕರಿಗೆ ಭರವಸೆ ನೀಡಲು ಇತ್ತೀಚಿನ ಪ್ರಯೋಗಾಲಯ ವರದಿಗಳನ್ನು ಡಿಸೆಂಬರ್ 25ರ ದಿನಾಂಕದೊಂದಿಗೆ ತನ್ನ ವೆಬ್ಸೈಟ್ನಲ್ಲಿ ಸಾರ್ವಜನಿಕವಾಗಿ ಪ್ರಕಟಿಸಿದೆ. “ನಮ್ಮ ಗ್ರಾಹಕರ ಸುರಕ್ಷತೆ ಮತ್ತು ನಂಬಿಕೆಯೇ ನಮ್ಮ ಮೊದಲ ಆದ್ಯತೆ. ನಮ್ಮ ಫಾರ್ಮ್ಗಳು ಮತ್ತು ಪ್ರಕ್ರಿಯೆಗಳಲ್ಲಿ ಅತ್ಯುನ್ನತ ಮಾನದಂಡಗಳನ್ನು ನಾವು ಪಾಲಿಸುತ್ತಿದ್ದೇವೆ” ಎಂದು ಕಂಪನಿ ಸ್ಪಷ್ಟಪಡಿಸಿದೆ.
