ಪೋಷಕಾಂಶಗಳ ನಿಧಿಯಾಗಿರುವ ಮತ್ತು ಅಡುಗೆ ಮನೆಯಲ್ಲಿ ಸಿಗುವ ಸುಲಭ ಪದಾರ್ಥಗಳಲ್ಲಿ ನಮ್ಮ ತ್ವಚೆಯ ಆರೈಕೆಗೆ ಸಹಾಯ ಮಾಡುವ ಒಂದು ನೈಸರ್ಗಿಕ ಪದಾರ್ಥವೆಂದರೆ ಹಾಲಿನ ಕೆನೆ.
ಈಗಂತೂ ಚಳಿಗಾಲ ಈ ಸಮಯದಲ್ಲಿ ತ್ವಚೆಯ ಆರೋಗ್ಯವನ್ನು ಕಾಪಾಡಿಕೊಳ್ಳುವುದು ಬಹಳ ಮುಖ್ಯ. ಹೀಗಾಗಿ ಜನ ತಮ್ಮ ಸೌಂದರ್ಯವನ್ನು ಕಾಪಾಡಿಕೊಳ್ಳಲು ಮಾರುಕಟ್ಟೆಯಲ್ಲಿ ಸಿಗುವ ದುಬಾರಿ ಉತ್ಪನ್ನಗಳನ್ನು ಖರೀದಿಸಿ ಬಳಸುತ್ತಾರೆ. ಆದರೆ ಇವುಗಳ ಬಳಕೆಯಿಂದ ಯಾವುದೇ ರೀತಿಯ ಫಲಿತಾಂಶ ಕಾಣದೇ ನಿರಾಸೆಗೊಳ್ಳುತ್ತಾರೆ. ಸೌಂದರ್ಯ ವರ್ಧನೆಗಾಗಿ ನಾವು ಅನೇಕ ಸೌಂದರ್ಯ ವರ್ಧಕಗಳಿಗೆ ಮೊರೆ ಹೋಗುತ್ತೇವೆ. ಮನೆಯಲ್ಲಿ ಸಿಗುವ ಅನೇಕ ಪದಾರ್ಥಗಳಿಂದ ಸೌಂದರ್ಯ ವದ್ದಿಸಿಕೊಳ್ಳಬಹುದು.ಅದರಲ್ಲಿ ಹೆಚ್ಚಿನದು ಹಾಲುಗಳ ಉತ್ಪನ್ನವೇ. ಎರಡು ದಿನಗಳಿಂದ ಸಂಗ್ರಹಿಸಿದ ಹಾಲಿನ ಕೆನೆ ಸೌಂದರ್ಯವರ್ಧಕವಾಗಿ ಕೆಲಸ ಮಾಡುತ್ತದೆ.
ಪ್ರಾಚೀನ ಕಾಲದಿಂದಲೂ ಹಾಲಿನ ಕೆನೆಯು ಪ್ರಮುಖವಾದ ಸೌಂದರ್ಯವರ್ಧಕ ಸಾಮಗ್ರಿಯಾಗಿದೆ. ಇದು ತ್ವಚೆಯನ್ನು ಒಣ ತ್ವಚೆಯಿಂದ ಮೃದು ತ್ವಚೆಯನ್ನಾಗಿ ಮಾಡಲು ಸಹಕರಿಸುತ್ತದೆ. ಹಾಲಿನಲ್ಲಿರುವ ಪ್ರತಿಯೊಂದು ಅಂಶಗಳು ಮುಖದ ಸೌಂದರ್ಯಕ್ಕೆ ಕಳೆಯನ್ನು ನೀಡುತ್ತವೆ. ಹಾಲಿನ ಕೆನೆಯಿಂದ ಹಲವಾರು ಪ್ರಯೋಜನಗಳು ತ್ವಚೆಗೆ ಲಭಿಸುತ್ತವೆ. ಇದು ತ್ವಚೆಗೆ ಸುರಕ್ಷಿತವಾದ ಮತ್ತು ಅಗ್ಗವಾದ ಮನೆ ಮದ್ದಾಗಿರುತ್ತದೆ.
ಹಾಲಿನ ಕೆನೆಯನ್ನು ಆರೋಗ್ಯದ ಕಾರಣಗಳಿಗಾಗಿ ಬಹುತೇಕ ಮಂದಿ ಸುಮ್ಮನೆ ಕಸದ ಬುಟ್ಟಿಗೆ ಹಾಕುತ್ತಾರೆ. ಆದರೆ ಅದರ ಪ್ರಯೋಜನ ತಿಳಿದಿದ್ದರೆ, ಪವಾಡಗಳನ್ನು ನಮ್ಮದಾಗಿಸಿಕೊಳ್ಳಬಹುದು. ಹಾಲಿನ ಕೆನೆಯ ಫೇಸ್ ಪ್ಯಾಕ್ ತ್ವಚೆಯನ್ನು ಹೊಳೆಯುವಂತೆ ಮಾಡುತ್ತದೆ, ಮೊಡವೆಗಳನ್ನು ನಿವಾರಿಸುತ್ತದೆ, ಜೊತೆಗೆ ತ್ವಚೆಯನ್ನು ಮೃದುವಾಗಿಸುತ್ತದೆ.
ಅಲ್ಲದೆ ಇದು ತ್ವಚೆಯಲ್ಲಿರುವ ಸುಕ್ಕುಗಳು ಮತ್ತು ಗೆರೆಗಳನ್ನು ನಿವಾರಿಸುತ್ತದೆ. ಆದ್ದರಿಂದ ಪ್ರತಿದಿನ ಮುಖಕ್ಕೆ ಕೆನೆಯನ್ನು ಹಚ್ಚಿಕೊಳ್ಳುವ ಅಭ್ಯಾಸವನ್ನು ಇರಿಸಿಕೊಂಡರೆ ಅಂದವಾದ ತ್ವಚೆಯುಳ್ಳ ಮುಖಾರವಿಂದವನ್ನು ಪಡೆಯಬಹುದು.
ಹಾಲಿನ ಕೆನೆ’ ಬಳಸುವ ಸೂಕ್ತ ವಿಧಾನ
- ಹುಳಿ ಇಲ್ಲದ ಕೆನೆಯನ್ನು ಮಸಾಜ್ಗಾಗಿ ಉಪಯೋಗಿಸಿ. ಒಣ, ಸಾಮಾನ್ಯ ಚರ್ಮದವರು ಕೆನೆ ಮಸಾಜ್ ಮಾಡಿಕೊಳ್ಳಬಹುದು. ಎಣ್ಣೆ ಚರ್ಮದವರು ಕೆನೆ ಉಪಯೋಗಿಸದಿರುವುದು ಒಳ್ಳೆಯದು.
- ಶುಷ್ಕಗೊಂಡ ಮುಖದ ಕಾಂತಿ ಹೆಚ್ಚಿಸಲು ಒಂದು ಚಮಚ ಕೆನೆಗೆ ಚಿಟಕಿ ಉಪ್ಪು ಹಾಕಿ ಮಿಶ್ರಣ ಮಾಡಿ ಮುಖಕ್ಕೆ ಹಚ್ಚಿ ವತ್ತಾಕಾರವಾಗಿ ಮಸಾಜ್ ಮಾಡಿ. ನಂತರ ಹೆಸರುಹಿಟ್ಟು ಹಚ್ಚಿ ಮುಖ ತೊಳೆಯಿರಿ.
- ಮೇಕಪ್ನಿಂದಾಗಿ ಅಲರ್ಜಿ ಆಗಿದ್ದಲ್ಲಿ ಕೆನೆಗೆ ಅರಿಶಿಣ ಹಾಕಿ ಮುಖಕ್ಕೆ ಮಸಾಜ್ ಮಾಡಿಕೊಳ್ಳಿ.
4.ಪ್ರತಿನಿತ್ಯ ಕೆನೆಗೆ ಕೇಸರಿ ದಳ ಹಾಕಿಕೊಂಡು ಮುಖ, ಕತ್ತು, ಕೈಗಳಿಗೆ ಮಸಾಜ್ ಮಾಡಿಕೊಳ್ಳುವುದರಿಂದ ಸನ್ ಬರ್ನ್ ಹೋಗುವುದು.
5.ಆರುತಿಂಗಳ ಮಗುವಿನಿಂದ ಹಿಡಿದು ಅರವತ್ತರ ಅಜ್ಜಿಯೂ ಕೆನೆ ಮಸಾಜ್ ಮಾಡಿಕೊಳ್ಳಬಹುದು.
6.ಮಗುವಿನ ಚರ್ಮ ಹೆಚ್ಚು ಕಪ್ಪಗಿದ್ದಲ್ಲಿ ಕೆನೆಗೆ ಶಿಗೇಕಾಯಿ ಹಾಗೂ ತುಸು ಅಡುಗೆ ಸೋಡಾ ಹಾಕಿ ಮೈಗೆ ಹಚ್ಚಿ ಸ್ನಾನ ಮಾಡಿಸುವುದರಿಂದ ಚರ್ಮದ ಬಣ್ಣ ಬದಲಾಗುವುದು.
7.ಮೊಣಕೈ, ಮೊಣಕಾಲು ಒರಟಾಗಿ ಕಪ್ಪಗಿದ್ದಲ್ಲಿ ಪ್ರತಿನಿತ್ಯ ಕೆನೆಗೆ ನಿಂಬೆರಸ ಸೇರಿಸಿ ಮಸಾಜ್ ಮಾಡಿಕೊಳ್ಳಿ.
8.ಕೆನೆ ಹಚ್ಚಿ ಬಾಡಿ ಮಸಾಜ್ ಮಾಡಿಕೊಂಡು ಪರಿಮಳಯುಕ್ತ ನೀರಿನಲ್ಲಿ ಮುಳುಗಿ ಅರ್ಧಗಂಟೆ ಬಿಟ್ಟು ಸ್ನಾನ ಮಾಡುವುದರಿಂದ ಮೈ ಪೂರ ಹಗುರವಾಗುವುದು. ಮೂಳೆಯ ನೋವು ಕಡಿಮೆಯಾಗುವುದು. ತುಟಿಗಳು ಕಪ್ಪಗಿದ್ದು ಅಥವಾ ಬಿರುಕು ಬಿಡುತ್ತಿದ್ದರೆ ಕೆನೆಗೆ ಜೇನುತುಪ್ಪ ಸೇರಿಸಿ ರಾತ್ರಿ ತುಟಿಗಳಿಗೆ ಹಚ್ಚಿಕೊಳ್ಳಿ. ಕ್ರಮೇಣ ಸಮಸ್ಯೆ ನಿವಾರಣೆ ಆಗುವುದು.
- ಎರಡು ಟೀ ಚಮಚ ಹಾಲಿನ ಕೆನೆಯ ಜೊತೆಗೆ ಒಂದು ಟೀ ಚಮಚ ಗಂಧದ ಪುಡಿ, ಒಂದು ಟೀ ಚಮಚ ಕಡಲೆ ಹಿಟ್ಟು, ಒಂದು ಚಿಟಿಕೆ ಅರಿಶಿನವನ್ನು ಬೆರೆಸಿಕೊಳ್ಳಿ. ಇದರ ಮೇಲೆ ಕೆಲವು ಹನಿಗಳಷ್ಟು ರೋಸ್ ವಾಟರ್ ಚಿಮುಕಿಸಿ. ಇವನ್ನೆಲ್ಲ ಸೇರಿಸಿ, ಗಟ್ಟಿಯಾದ ಪೇಸ್ಟ್ ತಯಾರಿಸಿಕೊಳ್ಳಿ. ಇದನ್ನು ನಿಮ್ಮ ಮುಖ ಮತ್ತು ಕುತ್ತಿಗೆ ಮೇಲೆ ಲೇಪಿಸಿ ಉಜ್ಜಿಕೊಳ್ಳಿ. 10 ನಿಮಿಷ ಬಿಟ್ಟು, ನಂತರ ಉಗುರು ಬೆಚ್ಚಗಿನ ನೀರಿನಲ್ಲಿ ಇದನ್ನು ತೊಳೆಯಿರಿ.
- ಒಣ ತ್ವಚೆಯ ಸಮಸ್ಯೆಯಿಂದ ಬಳಲುತ್ತಿರುವವರು ಈ ಫೇಸ್ ಪ್ಯಾಕ್ ಅನ್ನು ಬಳಸಬಹುದು. ಇದಕ್ಕಾಗಿ ನಾಲ್ಕು ಟೀ ಚಮಚ ಹಾಲಿನ ಕೆನೆಯ ಜೊತೆಗೆ ಎರಡು ಟೀ ಚಮಚ ರೋಸ್ ವಾಟರ್ ಬೆರೆಸಿಕೊಳ್ಳಿ. ಇದನ್ನು ಕಾಲುಗಳು, ಕೈಗಳು ಮತ್ತು ಮುಖದ ಮೇಲೆ ಹಚ್ಚಿಕೊಂಡು, ನಂತರ ಸ್ನಾನ ಮಾಡಿ.
- ಒಂದು ಚಿಟಿಕೆ ಕೇಸರಿಯನ್ನು ಒಂದು ಟೀ ಚಮಚ ಜೇನು ತುಪ್ಪ ಮತ್ತು ಒಂದು ಟೀ ಚಮಚ ಹಾಲಿನ ಕೆನೆಯ ಜೊತೆಗೆ ಮಿಶ್ರಣ ಮಾಡಿಕೊಳ್ಳಿ.ಈ ಪೇಸ್ಟನ್ನು ನಿಮ್ಮ ಮುಖಕ್ಕೆ ಹಚ್ಚಿಕೊಂಡು 30 ನಿಮಿಷ ಬಿಟ್ಟು, ನಂತರ ತೊಳೆಯಿರಿ. ಇದು ಅತ್ಯಂತ ಪರಿಣಾಮಕಾರಿಯಾದ ಫೇಸ್ ಪ್ಯಾಕ್ ಆಗಿದ್ದು, ಇದರಿಂದ ತ್ವಚೆ ಸುಂದರವಾಗಿ ಕಾಣುತ್ತದೆ.
- ಒಂದು ಟೀ ಚಮಚ ಹಾಲಿನ ಕೆನೆಯ ಜೊತೆಗೆ ಒಂದು ಟೀ ಚಮಚ ಓಟ್ಸ್, ಒಂದು ಟೀ ಚಮಚ ಅರಿಶಿನ ಮತ್ತು ಒಂದು ಟೀ ಚಮಚ ರೋಸ್ ವಾಟರ್ ಬೆರೆಸಿಕೊಳ್ಳಿ. ಇದನ್ನು ನಿಮ್ಮ ಮುಖಕ್ಕೆ ಲೇಪಿಸಿಕೊಳ್ಳಿ ಮತ್ತು ವೃತ್ತಾಕಾರವಾಗಿ ಐದು ನಿಮಿಷಗಳ ಕಾಲ ಉಜ್ಜಿ. ಇದನ್ನು 15 ನಿಮಿಷ ಬಿಟ್ಟು, ನಂತರ ತೊಳೆಯಿರಿ.
ಔಷಧವಾಗಿ ಕೆನೆಯ ಉಪಯೋಗಗಳು.
- ಹಾಲಿನ ಕೆನೆಯು ಅತ್ಯಂತ ಸತ್ವಭರಿತವಾಗಿದ್ದು ವ್ಯಕ್ತಿಯ ಶರೀರ ತೂಕವನ್ನು ಹೆಚ್ಚಿಸಲು ಸಹಕರಿಸುತ್ತದೆ. ಪ್ರತಿನಿತ್ಯ ಹಾಲಿನ ಕೆನೆಗೆ ಸಕ್ಕರೆ ಸೇರಿಸಿ ತಿಂದರೆ ಶರೀರದ ತೂಕ ಅಧಿಕವಾಗುತ್ತದೆ.
- ಹಾಲಿನ ಕೆನೆಯನ್ನು ಸಕ್ಕರೆಯೊಂದಿಗೆ ಸೇರಿಸಿ ತಿಂದರೆ ಎಸಿಡಿತಿ ಸಮಸ್ಯೆಯು ಕಡಿಮೆಯಾಗುತ್ತದೆ.
- ಹಾಲಿನ ಕೆನೆಯನ್ನು ಸೇವಿಸುವುದರಿಂದ ಮಲಬದ್ಧತೆ ನಿವಾರಣೆಯಾಗುತ್ತದೆ.
- ಹಾಲಿನ ಕೆನೆಯನ್ನು ಸೇವಿಸುವುದರಿಂದ ದೇಹದ ಮೂಳೆಗಳು ದ್ರುಢವಾಗುತ್ತವೆ.
- ಕಣ್ಣಿನ ರೆಪ್ಪೆಯಲ್ಲಿ ಕುರ ಮೂಡಿದಾಗ ಹಾಲಿನ ಕೆನೆಯನ್ನು ಕುರದ ಮೇಲೆ ಲೇಪಿಸಬೇಕು
- ಸುಟ್ಟ ಗಾಯದ ಮೇಲೆ ಹಾಲಿನ ಕೆನೆಯನ್ನು ಲೇಪಿಸಿದರೆ ಉರಿ ಹಾಗು ನೋವು ಕಡಿಮೆಯಾಗುತ್ತದೆ.
- ಚೇಳು, ಶತಪದಿ ಇತ್ಯಾದಿಗಳು ಕಡಿದಾಗ ಹಾಲಿನೆ ಕೆನೆಗೆ ಸ್ವಲ್ಪ ಅರಸಿನ ಪುಡಿ ಸೇರಿಸಿ ಲೇಪಿಸಬೇಕು.
- ಬಿಸಿ ಪದಾರ್ಥಗಳನ್ನು ಕುಡಿದು ತುಟಿ ಸುಟ್ಟರೆ ತುಟಿಯಮೇಲೆ ಹಾಲಿನ ಕೆನೆಯನ್ನು ಹಚ್ಚಬೇಕು.
ಗಮನಿಸಬೇಕಾದ ಅಂಶಗಳು
ಹೊಳೆಯುವಂಥ ತ್ವಚೆಯನ್ನು ಹೊಂದಲು ಹಾಲಿನ ಕೆನೆಯನ್ನು ಅನ್ವಯಿಸುತ್ತಾರೆ, ಇದು ಎಲ್ಲರ ತ್ವಚೆಗೂ ಹೊಂದುವುದಿಲ್ಲ ಬದಲಾಗಿ ಇದರಿಂದ ಆಗುವ ಅಡ್ಡಪರಿಣಾಮಗಳೇ ಹೆಚ್ಚು. ಹಾಗಾಗಿ ಎಣ್ಣೆ ಚರ್ಮ, ಮೊಡವೆ ಇರುವವರು ಹಾಗೂ ಸೂಕ್ಷ್ಮ ಚರ್ಮ ಹೊಂದಿದವರು ತ್ವಚೆಗೆ ಹಾಲಿನ ಕೆನೆ ಹಚ್ಚಲೇಬಾರದು.
ಸೌಮ್ಯ ಸನತ್.
