ಬದುಕು ಅನಿಶ್ಚಿತತೆಗಳ ಸಾಗರ. ಇಲ್ಲಿ ಎದುರಾಗುವ ಸವಾಲುಗಳು ಬದುಕನ್ನು ಆಸಕ್ತಿದಾಯಕವಾಗಿಸಿದರೆ, ಅವುಗಳನ್ನು ಮೆಟ್ಟಿ ನಿಲ್ಲುವ ಛಲವು ಜೀವನವನ್ನು ಅರ್ಥಪೂರ್ಣವಾಗಿಸುತ್ತದೆ. ಇಂದಿನ ಯುವ ಪೀಳಿಗೆಗೆ ಸೋಲು ಎನ್ನುವುದು ಅಂತ್ಯವಲ್ಲ, ಅದು ಹೊಸ ಅಧ್ಯಾಯದ ಮುನ್ನುಡಿ ಎಂಬ ಸತ್ಯದ ಅರಿವಾಗಬೇಕಿದೆ.
ಪಾಂಡವರ ಅಶ್ವಮೇಧ ಯಾಗದ ಸಂದರ್ಭದಲ್ಲಿ, ಮಹಾವೀರ ಅರ್ಜುನನಿಗೇ ಸವಾಲು ಹಾಕಿದವನು ಅವನ ಪುತ್ರ ಬಬ್ರುವಾಹನ. ತನ್ನೆದುರಿಗಿರುವುದು ಅಜೇಯ ವೀರ ಅರ್ಜುನನೆಂದು ತಿಳಿದಿದ್ದರೂ ಬಬ್ರುವಾಹನ ಎದೆಗುಂದಲಿಲ್ಲ. ಮಮಕಾರ ಮತ್ತು ಅಹಂಕಾರದ ಸವಾಲುಗಳನ್ನು ಮೀರಿ ನಿಂತ ಆತ, ತನ್ನ ಗುರಿನಿಷ್ಠೆಯಿಂದ ಅರ್ಜುನನನ್ನೇ ಮಣಿಸಿದನು. ಈ ಕಥೆ ನಮಗೆ ಕಲಿಸುವುದು ಏನೆಂದರೆ ಸವಾಲು ಎಷ್ಟೇ ದೊಡ್ಡದಿದ್ದರೂ, ಅಚಲ ಆತ್ಮವಿಶ್ವಾಸವಿದ್ದರೆ ಅಸಾಧ್ಯವಾದುದನ್ನೂ ಸಾಧಿಸಬಹುದು.
ಸೋಲು ಎಂಬುದು ನಮಗೆ ವಿಧಿಸಿದ ಶಿಕ್ಷೆಯಲ್ಲ, ಬದಲಿಗೆ ಅದು ನಮ್ಮ ದೋಷಗಳನ್ನು ತಿದ್ದಿ ಮತ್ತಷ್ಟು ಗಟ್ಟಿಗೊಳಿಸುವ ಉತ್ತಮ ಶಿಕ್ಷಕ. ಜೀವನದ ಸವಾಲುಗಳಿಗೆ ಶರಣಾಗುವ ಬದಲು, ಅವುಗಳನ್ನು ಎದುರಿಸುವ ಧೈರ್ಯ ತೋರಿದಾಗ ಮಾತ್ರ ಬದುಕಿನಲ್ಲಿ ನಿಜವಾದ ಸಾರ್ಥಕತೆ ಲಭಿಸುತ್ತದೆ. ನಮ್ಮ ಗುರಿ ಸದಾ ಸ್ಪಷ್ಟವಾಗಿರಲಿ; ಏಕೆಂದರೆ ಯಾವುದೇ ಶ್ರಮವಿಲ್ಲದೆ ಸುಲಭವಾಗಿ ಸಿಗುವ ಗೆಲುವಿಗಿಂತ, ಹೋರಾಡಿ ಪಡೆಯುವ ಯಶಸ್ಸು ಹೆಚ್ಚು ಮೌಲ್ಯಯುತವಾದುದು ಮತ್ತು ದೀರ್ಘಕಾಲ ಬಾಳುವಂತದ್ದು.
ಯುವ ಮಿತ್ರರೇ, ಸವಾಲುಗಳು ನಿಮ್ಮನ್ನು ಸೋಲಿಸಲು ಬರುವುದಿಲ್ಲ, ಬದಲಿಗೆ ನಿಮ್ಮೊಳಗಿನ ಸುಪ್ತ ಶಕ್ತಿಯನ್ನು ಜಾಗೃತಗೊಳಿಸಲು ಬರುತ್ತವೆ. ಸಂಕಷ್ಟಗಳ ಸುಳಿಯಿಂದ ಧೀರತನದಿಂದ ಮೇಲೆದ್ದು ಬಂದಾಗ ಮಾತ್ರ ನಿಮ್ಮ ವ್ಯಕ್ತಿತ್ವಕ್ಕೆ ಮೆರುಗು ಸಿಗುತ್ತದೆ. ಬಬ್ರುವಾಹನನಂತೆ ಸವಾಲುಗಳನ್ನು ಸ್ವಾಗತಿಸಿ, ಛಲದಿಂದ ಹೋರಾಡಿ ನಿಮ್ಮ ಜೀವನವನ್ನು ಸಾರ್ಥಕವಾಗಿಸಿಕೊಳ್ಳಿ.
ಡಾ.ಸುಧಾಕರ.ಜಿ.ಲಕ್ಕವಳ್ಳಿ.
