ನವದೆಹಲಿ: ವೈದ್ಯಕೀಯ ಶಿಕ್ಷಣದ ಕನಸು ಕಾಣುತ್ತಿರುವ ವಿದ್ಯಾರ್ಥಿಗಳಿಗೆ ಕೇಂದ್ರ ಸರ್ಕಾರದಿಂದ ಸಿಹಿ ಸುದ್ದಿ ಬಂದಿದೆ. ರಾಷ್ಟ್ರೀಯ ವೈದ್ಯಕೀಯ ಆಯೋಗ (NMC) 2024–25ನೇ ಶೈಕ್ಷಣಿಕ ವರ್ಷಕ್ಕೆ ದೇಶದಾದ್ಯಂತ 10,650 ಹೊಸ ಎಂಬಿಬಿಎಸ್ (MBBS) ಸೀಟುಗಳಿಗೆ ಅನುಮೋದನೆ ನೀಡಿದೆ.
ಮುಂದಿನ ಐದು ವರ್ಷಗಳಲ್ಲಿ 75,000 ಹೊಸ ವೈದ್ಯಕೀಯ ಸೀಟುಗಳನ್ನು ಸೃಷ್ಟಿಸುವ ಗುರಿಯನ್ನು ಸರ್ಕಾರ ಹೊಂದಿದೆ ಎಂದು ಆಯೋಗದ ಅಧ್ಯಕ್ಷ ಡಾ. ಅಭಿಜಿತ್ ಶೇಠ್ ತಿಳಿಸಿದ್ದಾರೆ.
41 ಹೊಸ ವೈದ್ಯಕೀಯ ಕಾಲೇಜುಗಳು ಸೇರಿಕೆ
ದೇಶದಲ್ಲಿ 41 ಹೊಸ ವೈದ್ಯಕೀಯ ಕಾಲೇಜುಗಳನ್ನು ಸೇರಿಸಿರುವುದರಿಂದ, ಒಟ್ಟು ವೈದ್ಯಕೀಯ ಸಂಸ್ಥೆಗಳ ಸಂಖ್ಯೆ ಈಗ 816 ಕ್ಕೆ ಏರಿದೆ. ಪದವಿಪೂರ್ವ (UG) ಸೀಟುಗಳ ವಿಸ್ತರಣೆಗೆ 170 ಅರ್ಜಿಗಳಲ್ಲಿ 10,650 ಹೊಸ ಸೀಟುಗಳನ್ನು ಎನ್ಎಂಸಿ ಅನುಮೋದಿಸಿದೆ.
ಇವುಗಳಲ್ಲಿ 41 ಸರ್ಕಾರಿ ಹಾಗೂ 129 ಖಾಸಗಿ ಸಂಸ್ಥೆಗಳಿವೆ. ಈ ಸೇರ್ಪಡೆಯಿಂದ 2024–25ರ ಸಾಲಿನಲ್ಲಿ ದೇಶದ ಒಟ್ಟು MBBS ಸೀಟುಗಳ ಸಂಖ್ಯೆ 1,37,600 ಕ್ಕೆ ತಲುಪಿದೆ. ಇದರಲ್ಲಿ ರಾಷ್ಟ್ರೀಯ ಪ್ರಾಮುಖ್ಯತೆಯ ಸಂಸ್ಥೆಗಳ (INIs) ಸೀಟುಗಳೂ ಸೇರಿವೆ.
ಪಿಜಿ ಸೀಟುಗಳಲ್ಲೂ ಹೆಚ್ಚಳ
ಸ್ನಾತಕೋತ್ತರ (PG) ಕೋರ್ಸ್ಗಳಿಗೆ ಸಹ 5,000 ಹೊಸ ಸೀಟುಗಳನ್ನು ಸೇರಿಸುವ ನಿರೀಕ್ಷೆ ಇದೆ. ಎನ್ಎಂಸಿ ಈ ವರ್ಷ 3,500 ಕ್ಕೂ ಹೆಚ್ಚು ಹೊಸ ಹಾಗೂ ನವೀಕರಣ ಅರ್ಜಿಗಳನ್ನು ಸ್ವೀಕರಿಸಿದೆ. ಇದರ ಫಲವಾಗಿ ಒಟ್ಟು ಪಿಜಿ ಸೀಟುಗಳ ಸಂಖ್ಯೆ 67,000 ಕ್ಕೆ ಏರಲಿದೆ.
ಯುಜಿ ಮತ್ತು ಪಿಜಿ ಸೇರಿ ಈ ವರ್ಷ ಒಟ್ಟು 15,000 ಹೊಸ ವೈದ್ಯಕೀಯ ಸೀಟುಗಳು ಲಭ್ಯವಾಗಲಿವೆ.
ಸಂಶೋಧನೆಗೆ ಉತ್ತೇಜನ
ವೈದ್ಯಕೀಯ ಮೌಲ್ಯಮಾಪನ ಮತ್ತು ರೇಟಿಂಗ್ ಮಂಡಳಿ (MARB) ನೀಡಿದ ನಿರ್ಧಾರಗಳ ವಿರುದ್ಧದ ಎಲ್ಲ ಮೇಲ್ಮನವಿಗಳನ್ನು ನ್ಯಾಯಾಲಯದ ಹಸ್ತಕ್ಷೇಪವಿಲ್ಲದೆ ಪರಿಹರಿಸಲಾಗಿದೆ ಎಂದು ಡಾ. ಶೇಠ್ ಹೇಳಿದ್ದಾರೆ.
ಇದನ್ನು ಓದಿ –ಹಾಸನಾಂಬೆ ದರ್ಶನದಿಂದ ಮರಳುತ್ತಿದ್ದ ವೇಳೆ ಭೀಕರ ಅಪಘಾತ – ಇಬ್ಬರ ದುರ್ಮರಣ
ಇದೇ ವೇಳೆ ಎನ್ಎಂಸಿ ವೈದ್ಯಕೀಯ ಪಠ್ಯಕ್ರಮದಲ್ಲಿ ಕ್ಲಿನಿಕಲ್ ಸಂಶೋಧನೆಯನ್ನು (Clinical Research) ಸೇರಿಸಲು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿಯೊಂದಿಗೆ ಸಹಕಾರ ಮಾಡುತ್ತಿದೆ.
