ಕೇರಳ: ಶಬರಿಮಲೆಯಲ್ಲಿ ಅಯ್ಯಪ್ಪನ ದರ್ಶನಕ್ಕಾಗಿ ಭಾರಿ ಜನಸ್ತೋಮ ಹರಿದುಬರುತ್ತಿರುವ ನಡುವೆ ದುರ್ಘಟನೆ ಸಂಭವಿಸಿದೆ. ದರ್ಶನಕ್ಕೆ ಬಂದಿದ್ದ 58 ವರ್ಷದ ಮಾಲಾಧಾರಿ ಮಹಿಳೆ ಕುಸಿದು ಬಿದ್ದು ಸಾವನ್ನಪ್ಪಿದ್ದಾರೆ.
ಕೋಝಿಕ್ಕೋಡ್ನಿಂದ ಬಂದಿದ್ದ ಈ ಮಹಿಳೆ ಪಂಪಾದಿಂದ ಅಪ್ಪಾಚಿಮೇಡು ಕಡೆಗೆ ಸಾಗುತ್ತಿರುವಾಗ ಹಠಾತ್ ಕುಸಿದು ಮೃತಪಟ್ಟಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಘಟನೆ ಭಕ್ತರ ನೂಕುನುಗ್ಗಲು ಮತ್ತು ದೈಹಿಕ ಶ್ರಮದ ನಡುವೆಯೇ ಸಂಭವಿಸಿದ್ದು, ಯಾತ್ರಿಕರ ಸುರಕ್ಷತೆ ಕುರಿತು ಮರುಚಿಂತನೆಗೆ ಕಾರಣವಾಗಿದೆ.
ಇದರ ಜೊತೆಗೆ, ಶಬರಿಮಲೆ ಯಾತ್ರಿಕರಿಗೆ ‘ಮಿದುಳು ತಿನ್ನುವ ಅಮೀಬಾ’ ಎಂದು ಕರೆಯಲ್ಪಡುವ ನೇಗೇರಿಯಾ ಫೌಲೇರಿ ಸೋಂಕಿನ ಬಗ್ಗೆ ಕೇರಳ ಸರ್ಕಾರ ಮುನ್ನೆಚ್ಚರಿಕೆ ಜಾರಿಗೊಳಿಸಿದೆ. ರಾಜ್ಯದಲ್ಲಿ ಇತ್ತೀಚೆಗೆ ಕಂಡುಬಂದ ಅಮೀಬಿಕ್ ಮೆನಿಂಗೊಎನ್ಸೆಫಲೈಟಿಸ್ ಪ್ರಕರಣಗಳ ಹಿನ್ನೆಲೆಯಲ್ಲಿ ಯಾತ್ರಿಕರು ಹೆಚ್ಚಿನ ಎಚ್ಚರಿಕೆ ವಹಿಸಲು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಸಲಹೆ ನೀಡಿದೆ.
ಸರ್ಕಾರದ ಸುರಕ್ಷತಾ ಮಾರ್ಗಸೂಚಿಗಳ ಮುಖ್ಯ ಅಂಶಗಳು:
- ನೇಗೇರಿಯಾ ಫೌಲೇರಿ ಎಂಬುದು ಸ್ವತಂತ್ರವಾಗಿ ಬದುಕುವ ಅಮೀಬಾ; ಇದು ಬೆಚ್ಚಗಿನ ಸಿಹಿನೀರಿನಲ್ಲಿ ಮತ್ತು ಮಣ್ಣಿನಲ್ಲಿ ಕಾಣಿಸಿಕೊಳ್ಳುತ್ತದೆ.
ಉದಾಹರಣೆ: ನಿಂತ ನೀರು, ಕೊಳಗಳು, ಈಜುಕೊಳಗಳು, ಕೆರೆಗಳು. - ಈ ಸೋಂಕು ವ್ಯಕ್ತಿಯಿಂದ ವ್ಯಕ್ತಿಗೆ ಹರಡುವುದಿಲ್ಲ; ಕಲುಷಿತ ನೀರನ್ನು ಕುಡಿಯುವುದರಿಂದಲೂ ಸೋಂಕು ತಗಲುವುದಿಲ್ಲ.
- ಅಮೀಬಾ ನೀರಿನಿಂದ ಮೂಗಿನಲ್ಲಿ ಪ್ರವೇಶಿಸಿದಾಗ ಅದು ಮೆದುಳಿಗೆ ತಲುಪಿ ‘ಅಮೀಬಿಕ್ ಮೆನಿಂಗೊಎನ್ಸೆಫಲೈಟಿಸ್’ ಎಂಬ ಅತ್ಯಂತ ಅಪರೂಪದ ಆದರೆ ಮಾರಕ ರೋಗವನ್ನು ಉಂಟುಮಾಡುತ್ತದೆ.
- ಯಾತ್ರಿಕರು ನಿಂತ ನೀರಿನಲ್ಲಿ ಸ್ನಾನ ಮಾಡುವಾಗ ಮೂಗಿಗೆ ನೀರು ಹೋಗದಂತೆ ಮೂಗಿನ ಕ್ಲಿಪ್ ಬಳಸುವಂತೆ ಸಲಹೆ ನೀಡಲಾಗಿದೆ.
- ನೀರಿನ ಸಂಪರ್ಕವಾದ 7 ದಿನಗಳಲ್ಲಿ ಕೆಳಗಿನ ಲಕ್ಷಣಗಳು ಕಾಣಿಸಿದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಬೇಕು:
- ಜ್ವರ
- ತೀವ್ರ ತಲೆನೋವು
- ವಾಕರಿಕೆ / ವಾಂತಿ
- ಕುತ್ತಿಗೆ ಬಿಗಿತ
- ಗೊಂದಲ, ವರ್ತನೆಯಲ್ಲಿ ಬದಲಾವಣೆ, ಮಾನಸಿಕ ಅಸ್ಥಿರತೆ
ಆರೋಗ್ಯ ಇಲಾಖೆ ಆಯುಕ್ತರು ಯಾತ್ರಿಕರಿಗೆ ಅನಾವಶ್ಯಕವಾಗಿ ನೀರಿನಲ್ಲಿ ಮುಳುಗುವುದನ್ನು, ನಿಂತ ನೀರಿನಲ್ಲಿ ಸ್ನಾನ ಮಾಡುವುದನ್ನು ತಪ್ಪಿಸಿ, ಎಲ್ಲಾ ಮುನ್ನೆಚ್ಚರಿಕೆ ಕ್ರಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕೆಂದು ಮನವಿ ಮಾಡಿದ್ದಾರೆ.ಇದನ್ನು ಓದಿ –ಸಿಎಂ ಸಿದ್ದರಾಮಯ್ಯ ನ.20-21 ಮೈಸೂರು ಪ್ರವಾಸ
ಶಬರಿಮಲೆ ಯಾತ್ರೆ ಮುಂದುವರಿಯುತ್ತಿರುವ ಈ ಸಮಯದಲ್ಲಿ ಯಾತ್ರಿಕರ ಭದ್ರತೆ ಮತ್ತು ಆರೋಗ್ಯದ ಕುರಿತು ಸರ್ಕಾರ ಗಂಭೀರವಾಗಿ ಕ್ರಮ ಕೈಗೊಂಡಿದೆ.
