ನವದೆಹಲಿ: ಕೇಂದ್ರ ಸರ್ಕಾರವು 2026ರ ಏಪ್ರಿಲ್ 1ರಿಂದ ದೇಶದ ಎಲ್ಲಾ ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಕನಿಷ್ಠ ರಿಸರ್ಚ್ ಆಕ್ಟೇನ್ ಸಂಖ್ಯೆ (RON) 95 ಹೊಂದಿರುವ ಮತ್ತು 20 ಶೇಕಡಾ ಎಥೆನಾಲ್ ಮಿಶ್ರಿತ ಪೆಟ್ರೋಲ್ (ಇ20) ಮಾರಾಟವನ್ನು ಕಡ್ಡಾಯಗೊಳಿಸಿದೆ.
ಚಾಲಕರ ಮೇಲೆ ಪರಿಣಾಮ?
95 RON ಹೊಂದಿರುವ ಪೆಟ್ರೋಲ್ ಅನ್ನು ಸಾಮಾನ್ಯವಾಗಿ ಪ್ರೀಮಿಯಂ ಅಥವಾ ಹೈ-ಆಕ್ಟೇನ್ ಪೆಟ್ರೋಲ್ ಎಂದು ಕರೆಯಲಾಗುತ್ತದೆ. ಸಾಮಾನ್ಯ ಪೆಟ್ರೋಲ್ ಸಾಮಾನ್ಯವಾಗಿ 90ರಷ್ಟಿನ ಆಕ್ಟೇನ್ ಮೌಲ್ಯ ಹೊಂದಿರುತ್ತದೆ. ಹೆಚ್ಚಿನ ಆಕ್ಟೇನ್ ಹೊಂದಿರುವುದರಿಂದ 95 RON ಪೆಟ್ರೋಲ್ ಹೆಚ್ಚಿನ ಕಂಪ್ರೆಷನ್ ಎಂಜಿನ್ಗಳಲ್ಲಿ ಪೂರ್ವ ದಹನ (ಪ್ರೀ-ಇಗ್ನಿಷನ್) ಸಮಸ್ಯೆಯನ್ನು ಕಡಿಮೆ ಮಾಡುತ್ತದೆ. ಇದರಿಂದ ಎಂಜಿನ್ ಕಾರ್ಯಾಚರಣೆ ಸುಗಮವಾಗುತ್ತದೆ.
ಟರ್ಬೋಚಾರ್ಜ್ಡ್ ಅಥವಾ ಹೆಚ್ಚಿನ ಕಾರ್ಯಕ್ಷಮತೆಯ ಎಂಜಿನ್ ಹೊಂದಿರುವ ವಾಹನಗಳಲ್ಲಿ 95 RON ಪೆಟ್ರೋಲ್ ಉತ್ತಮ ಶಕ್ತಿ ಹಾಗೂ ವೇಗವರ್ಧನೆ ನೀಡುತ್ತದೆ. ಇದರಿಂದ ಎಂಜಿನ್ ತನ್ನ ಸಂಪೂರ್ಣ ಸಾಮರ್ಥ್ಯದಲ್ಲಿ ಕಾರ್ಯನಿರ್ವಹಿಸಲು ಸಹಕಾರಿಯಾಗುತ್ತದೆ.
ಪೆಟ್ರೋಲಿಯಂ ಸಚಿವಾಲಯದ ಅಧಿಸೂಚನೆ
ಫೆಬ್ರವರಿ 17ರಂದು ಪೆಟ್ರೋಲಿಯಂ ಸಚಿವಾಲಯ ಹೊರಡಿಸಿದ ಅಧಿಸೂಚನೆಯಲ್ಲಿ, ಪೆಟ್ರೋಲಿಯಂ ಕಂಪನಿಗಳು ಭಾರತೀಯ ಮಾನದಂಡಗಳ ಬ್ಯೂರೋ (BIS) ನಿಯಮಾನುಸಾರ ಕನಿಷ್ಠ 95 RON ಹೊಂದಿರುವ ಮೋಟಾರ್ ಸ್ಪಿರಿಟ್ (ಪೆಟ್ರೋಲ್) ಅನ್ನು 20 ಶೇಕಡಾ ಎಥೆನಾಲ್ನೊಂದಿಗೆ ಮಿಶ್ರಣ ಮಾಡಿ ಮಾರಾಟ ಮಾಡಬೇಕೆಂದು ಸೂಚಿಸಲಾಗಿದೆ.ಇದನ್ನು ಓದಿ –ಫೆ.28ರಂದು ಉಚಿತ HPV ಲಸಿಕೆ ಅಭಿಯಾನಕ್ಕೆ ಮೋದಿ ಚಾಲನೆ
ಸೀಮಿತ ಅವಧಿಗೆ ವಿನಾಯಿತಿ
ಕೇಂದ್ರ ಸರ್ಕಾರವು ವಿಶೇಷ ಪರಿಸ್ಥಿತಿಗಳಲ್ಲಿ ಮತ್ತು ನಿರ್ದಿಷ್ಟ ವಲಯಗಳಿಗೆ ಸೀಮಿತ ಅವಧಿಗೆ ವಿನಾಯಿತಿ ನೀಡಬಹುದು. ಎಥೆನಾಲ್ ಅನ್ನು ಕಬ್ಬು, ಜೋಳ ಅಥವಾ ಇತರೆ ಧಾನ್ಯಗಳಿಂದ ತಯಾರಿಸಲಾಗುತ್ತದೆ. ತೈಲ ಆಮದು ಅವಲಂಬನೆ ಕಡಿಮೆ ಮಾಡುವುದು ಹಾಗೂ ವಾಯು ಮಾಲಿನ್ಯ ಇಳಿಸುವ ಉದ್ದೇಶದಿಂದ ಗ್ಯಾಸೋಲಿನ್ನಲ್ಲಿ ಎಥೆನಾಲ್ ಮಿಶ್ರಣವನ್ನು ಸರ್ಕಾರ ಕಡ್ಡಾಯಗೊಳಿಸಿದೆ.
