ಇಂದಿನ ಉನ್ನತ ಶಿಕ್ಷಣದ ಓಟದಲ್ಲಿ ಪದವಿಗಳು ಕೇವಲ ಬ್ಯಾಂಕ್ ಬ್ಯಾಲೆನ್ಸ್ ಹೆಚ್ಚಿಸುವ ಸಾಧನಗಳಾಗಿ ಬದಲಾಗುತ್ತಿವೆ. ಆದರೆ, ತಾನು ಕಲಿತ ಉನ್ನತ ವಿದ್ಯೆ ಮತ್ತು ಕೌಶಲಗಳು ತನ್ನ ಮಣ್ಣಿನ ಬಡ ಜನರ ಕಣ್ಣೀರು ಒರೆಸಲು ಬಳಕೆಯಾಗಬೇಕು ಎಂದು ನಂಬಿ, ಅದನ್ನು ಕಾರ್ಯರೂಪಕ್ಕೆ ತಂದವರು ಖ್ಯಾತ ನರರೋಗ ತಜ್ಞೆ ಡಾ. ಬಿಂದು ಮೆನನ್.
ನಗರದ ಐಷಾರಾಮಿ ಆಸ್ಪತ್ರೆಗಳಲ್ಲಿ ಎಸಿ ರೂಮಿನ ಸುಖವನ್ನೇ ಜೀವನ ಎಂದು ಭಾವಿಸಬಹುದಾಗಿದ್ದ ಇವರು, ಇಂದು ಹಳ್ಳಿಗಳ ಪಾಲಿನ ನಡೆದಾಡುವ ಸಂಜೀವಿನಿಯಾಗಿದ್ದಾರೆ.
ಪಾರ್ಶ್ವವಾಯು ಮತ್ತು ಅಪಸ್ಮಾರದಂತಹ ಭಯಾನಕ ಕಾಯಿಲೆಗಳು ಬಂದಾಗ ದಾರಿ ಕಾಣದೆ ಕತ್ತಲಲ್ಲಿ ತಡಕಾಡುವ ಗ್ರಾಮೀಣ ಬಡವರ ಮನೆಬಾಗಿಲಿಗೇ ವೈದ್ಯಕೀಯ ಸೇವೆಯನ್ನು ಒಯ್ದ ಇವರ ಶ್ರಮ ಯುವಜನತೆಗೆ ದೊಡ್ಡ ಪಾಠ. ಡಾ. ಬಿಂದು ಮೆನನ್ ಅವರಿಗೆ ಅಂತರಾಷ್ಟ್ರೀಯ ಸಾಧಕ ಪ್ರಶಸ್ತಿ ಮತ್ತು ಅಮೆರಿಕನ್ ಅಕಾಡೆಮಿ ಆಫ್ ನ್ಯೂರಾಲಜಿಯಂತಹ ವಿಶ್ವದ ಪ್ರತಿಷ್ಠಿತ ಗೌರವಗಳು ಲಭಿಸಿವೆ.
ಇಷ್ಟೆಲ್ಲಾ ಕೀರ್ತಿ ಇದ್ದರೂ, ವಾರಾಂತ್ಯದ ರಜೆಗಳಲ್ಲಿ ಅವರು ವಿಶ್ರಾಂತಿ ಪಡೆಯುವ ಬದಲು ಹಳ್ಳಿಗಳ ಧೂಳಿನ ಹಾದಿಯಲ್ಲಿ ಸಂಚರಿಸುತ್ತಾ ಉಚಿತ ಚಿಕಿತ್ಸೆ ನೀಡುತ್ತಾರೆ.
ಯುವ ತರುಣ ತರುಣಿಯರೇ, ಇವರಿಂದ ನಾವು ಕಲಿಯಬೇಕಾದದ್ದು ಕೇವಲ ವೈದ್ಯಕೀಯ ಸೇವೆಯನ್ನಲ್ಲ, ಬದಲಾಗಿ ನಮ್ಮ ವೃತ್ತಿಯ ಬಗ್ಗೆ ನಮಗಿರಬೇಕಾದ ಸಾಮಾಜಿಕ ಜವಾಬ್ದಾರಿಯನ್ನು.
ನೀವು ಇಂಜಿನಿಯರ್ ಆಗಿರಲಿ, ಶಿಕ್ಷಕರಾಗಿರಲಿ ಅಥವಾ ಕೃಷಿಕರಾಗಿರಲಿ; ನಿಮ್ಮ ಜ್ಞಾನ ಸಮಾಜದ ಕಟ್ಟಕಡೆಯ ವ್ಯಕ್ತಿಯ ಮುಖದಲ್ಲಿ ನಗು ಮೂಡಿಸಿದರೆ ಮಾತ್ರ ನಿಮ್ಮ ಸಾಧನೆಗೆ ನಿಜವಾದ ಬೆಲೆ ಸಿಗುತ್ತದೆ.
ಕೇವಲ ಸಾಮಾಜಿಕ ಜಾಲತಾಣಗಳಲ್ಲಿನ ಲೈಕ್ಸ್ ಅಥವಾ ವ್ಯವಸ್ಥೆಯ ಮೇಲಿನ ದೂರುಗಳು ಸಮಾಜವನ್ನು ಬದಲಿಸುವುದಿಲ್ಲ. ಬದಲಿಗೆ, ಬದಲಾವಣೆಯ ಕಿಡಿ ನಮ್ಮ ಒಳಗೇ ಆರಂಭವಾಗಬೇಕು.
ನಮ್ಮ ವೃತ್ತಿ ನಮಗೆ ಬದುಕು ನೀಡಿದರೆ, ನಮ್ಮ ಪ್ರವೃತ್ತಿ ಸಮಾಜಕ್ಕೆ ನೆಮ್ಮದಿ ನೀಡಬೇಕು ಎನ್ನುವ ಬಿಂದು ಮೆನನ್ ಅವರ ಮಾತುಗಳು ನಿಮ್ಮನ್ನು ಹುರಿದುಂಬಿಸಲಿ. ದೊಡ್ಡ ಬಜೆಟ್ ಇಲ್ಲದೆಯೂ, ಕೇವಲ ಮಿಡಿಯುವ ಮನಸ್ಸಿದ್ದರೆ ಅದ್ಭುತಗಳನ್ನು ಮಾಡಬಹುದು ಎಂಬುದಕ್ಕೆ ಇವರೇ ಸಾಕ್ಷಿ.
ಬನ್ನಿ, ನಿಮ್ಮಲ್ಲಿರುವ ಪ್ರತಿಭೆಯನ್ನು ಕೇವಲ ಸ್ವಾರ್ಥಕ್ಕಾಗಿ ಬಳಸದೆ, ಈ ದೇಶದ ಅಭಿವೃದ್ಧಿಗೆ ಮತ್ತು ನೊಂದವರ ಸೇವೆಗೆ ಧಾರೆ ಎರೆಯಿರಿ.
ಜ್ಞಾನವು ಸೇವೆಯೊಂದಿಗೆ ಬೆರೆತಾಗ ಮಾತ್ರ ಅದು ಪವಿತ್ರವಾಗುತ್ತದೆ ಎಂಬ ಸತ್ಯವನ್ನು ಅರಿತು, ಹೊಸ ಭಾರತದ ನಿರ್ಮಾಣಕ್ಕೆ ಇಂದೇ ಕೈಜೋಡಿಸಿ. ನಿಮ್ಮ ಒಂದು ಸಣ್ಣ ಸಮಾಜಮುಖಿ ಹೆಜ್ಜೆ ಲಕ್ಷಾಂತರ ಜೀವಗಳಿಗೆ ಭರವಸೆಯ ಬೆಳಕಾಗಬಹುದು.
ಇಂತಹ ನಿಸ್ವಾರ್ಥ ಹಾದಿಯಲ್ಲಿ ಸಾಗಲು ಇಂದೇ ಸನ್ನದ್ಧರಾಗಿ. ನಿಮ್ಮ ಪ್ರತಿಭೆ ಮಣ್ಣಿನ ಸೇವೆಗೆ ಮುಡಿಪಾಗಿರಲಿ.
ಡಾ.ಸುಧಾಕರ.ಜಿ.ಲಕ್ಕವಳ್ಳಿ.
